Víctor Rivas (Pontevedra, 1965) dedícase profesionalmente á ilustración, debuxo de cómic e á comunicación visual dende hai décadas. Atópase cómodo traballando en contornos dixitais e en calquera estilo de debuxo, aínda que os mundos fantásticos e as estéticas vitorianas son as súas preferidas. Para Xerais ilustrou o proxecto literario de Ledicia Costas «Escarlatina», que consta de tres títulos: «Escarlatina, a cociñeira defunta» (2014), «Esmeraldina, a pequena defunta» (2016) e «Os arquivos secretos de Escarlatina» (2017), así como a novela «Vampira de biblioteca» (Xerais 2020), da mesma autora. Tamén ilustrou as novelas «Volverás, golfiño», de Andrea Maceiras (Xerais 2014), «Quokka Moka», de María Solar (Xerais 2019), e mais o poemario «No xardín do poeta» de Antonio García Teijeiro (Xerais 2021). Xunto con Eva Mejuto publicou o álbum ilustrado «Dez gatiñas viaxeiras» (Xerais 2019).